曾俊華之前搵過森美、麥齊光拍片撐佢，今次薯片叔叔噚日朝早就預告，會有個同佢多年嚟一直拍住上嘅「女特首」拍片撐佢。到下午薯片叔叔公開條片開估，原來佢話嘅「女特首」係佢屋企嘅女特首，即係佢太太曾黃蓮華，曾太仲係片入面講同薯片叔叔邂逅經過，八方覺得薯片叔叔似放閃多過拉票囉。
有政界中人同八方講，薯片叔叔今次參選，其中一個好重要支柱就係太太，曾太喺條片一開始，就被問到佢係咪屋企女特首，曾太冇承認，但笑住話總之屋企乜事都由佢管！
之後曾太大談同薯片叔叔邂逅經過，話佢同丈夫係波士頓大學一年級火雞節時認識，因為當地習俗係參加嘅男同學要着西裝約女伴食晚餐，而曾太當時就係薯片叔叔女伴，結果咁就一見鍾情！不過曾太就「投訴」薯片叔叔唔浪漫，原來咁耐冇講過「嗰3個字」，即係「我愛你」，但就會用含蓄方式表達，曾太仲拎咗本當年由薯片叔叔親手做、畀曾太嘅情書，書入面由文字到相都由薯片叔一手包辦，曾太仲大晒書中相片，包括初相識時曾俊華冇鬍鬚的「激罕」舊照，成個薯頭咁，同拍拖時嘅年輕相片。
曾太大談當年情
至於曾太眼中嘅薯片叔叔，佢形容唔覺有咩缺點，只係成日唔記得幾時生日同結婚，仲話就快到情人節，相信老公都唔會記得，不過佢亦唔會提老公，但就話老公處理事情同解決問題能力非常高，大學一年級讀書時，雖然薯片叔叔唔係讀醫，一樣可以幫讀護士嘅太太「出貓」做功課，令佢佩服到不得了，曾太仲話參選係薯片叔叔使命，點都支持丈夫努力去做。
李八方
