年年渣馬都好多名人跑，好似噚日八方落場，就撞到跑10公里嘅商經局局長蘇錦樑。傾傾吓嗰陣，我哋嘅業界代表、體育演藝文化及出版界立法會議員馬逢國從後上前主動埋嚟搭訕。嘩阿馬生，你仲慢過6年冇跑嘅局長？
馬逢國話，自己今年係第6年跑10公里，原本預期一個鐘內就跑完，結果跑咗一小時零十幾分鐘。他解釋話冇認真備戰，「拉布嗰時咪走上立法會五樓common room跑步機跑吓咁囉」，居然將開會偷懶公然爆響口，唔通食咗「誠實豆沙包」？
即將喺6月離任中大校長嘅沈祖堯，噚日首次用校長身份跑10公里。佢話今年跑渣馬，係想勉勵中大學生同年輕人迎難而上，「好似我咁老都跑得郁，佢哋都得嘅」。佢話今次時間係1小時兩分鐘，賽前訓練兩個月，每周跑兩、三次，都算係咁喎。
霍啟剛：情人節係星期幾？
同樣跑10公里嘅仲有港協暨奧委會副秘書長霍啟剛，跑出1小時5分鐘左右成績，佢話有進步空間，希望明年再接再厲。第二年跑嘅佢話今年天氣乾爽，「朝早有啲凍，但都好過舊年傾盆大雨，整到對鞋入晒水」。問到情人節點同老婆郭晶晶慶祝，佢反問「情人節係星期幾？」幾秒後先醒，「係喎，多謝你提醒我，即刻去訂餐廳先！」
另外，公民黨區議員余德寶亦代表油尖旺區議會跑渣馬10公里，佢第一次跑渣馬只係用咗1小時10分完成賽事，佢話事前冇咩練習 ，有呢個成績算滿意。
李八方
