Angelababy（楊穎） 上個月17日喺香港誕下B仔「小海綿」，老公黃曉明就喺身邊陪住，仲親出派水俾一眾在場等待好消息嘅傳媒。隔咗兩日，Baby喺曉明陪伴下已經可以出院，而啱啱出世嘅小海綿就包到實一實，放咗喺BB車入面。
Baby喺產後好少更新微博，只係轉發過一張曉明同小海綿對拳嘅手仔相，同like過一段新年訊息，係咁多，始終生完BB，需要啲時間回復番元氣嘅。
直到前日元宵節，Baby終於返嚟喇，佢喺微博貼咗3張新相，留言話：「謝謝大家喜歡娉婷。願大家節日團圓，和和美美！（你们所有的想念我都知道）」最尾佢仲加多個心心。呢次係佢產後第一次貼相，仍然不失「美圖秀秀」代言人嘅本色，幫手上面嘅湯丸加咗啲pokemon圖案，而Baby本人呢，所有產後發福、水腫、谷奶呢啲特徵，都俾佢好巧妙咁用湯丸遮晒，但就睇得出好好精神。唔知曉明打算喺後日情人節定小海綿滿月，先公佈全家福呢？