情人放閃沒有最閃，只有更閃，郵輪上嘅愛情故事，唔再只有《鐵達尼號》嘅Jack同Rose。有郵輪藉情人節推三日兩夜「放閃」套餐，客人可透過船身18層樓高嘅LED燈光系統，喺維港上播放巨型愛的宣言，但套餐要10萬蚊，郵輪公司總裁就話「愛是無價」。
走奢華路線嘅星夢郵輪，旗下嘅「雲頂夢號」推出價值10萬蚊嘅三日兩夜「放閃」套餐，客人可透過全港最大兼全球唯一郵輪LED燈光系統播放「愛的宣言」，全長約300米、高18層樓，喺香港停泊同航行期間，以滾動或靜態方式顯示。
每周限一對客人預訂
為免有其他情侶嘅「愛的宣言」破壞氣氛，該套餐每個禮拜只限一對客人預訂。另外，套餐亦包括豪華汽車接送、入住以玫瑰花瓣裝飾嘅高級套房、24小時歐式管家服務、水療與按摩療程及有攝影師拍攝旅程等，務求為情侶製造獨一無二嘅浪漫周末。行程2月14日開始預訂，3月起逢周五由港出發，周日回程。
總裁戴卓爾．布朗（Thatcher Brown）指透過巨型LED燈光系統，喺7百萬人面前示愛能讓愛變得強大，亦能製造愛嘅回憶。佢話套餐係一條龍服務，10萬蚊亦未必租到直升機，但就有多種豪華體驗，物有所值。