恒生銀行（011）傳訊及可持續發展總監張樹槐（水哥）有「長跑達人」之稱，噚日渣打香港馬拉松又點少得佢，不過水哥今次慘慘豬呀，開跑一個鐘左右就踩到路上貓眼石而跌倒，手踭同隻手傷晒。水哥原先以為皮外傷，跌倒起番身繼續跑，點知一路跑，傷口一路「標」血（聽落都得人驚），於是中途去救護站療傷，之後負傷繼續跑，痛住跑多3個幾鐘，最終以超過4小時完成全馬，亦完成佢人生第62個全馬。認真佩服水哥嘅堅毅精神。