每年一度嘅香港渣打馬拉松賽事噚日舉行，原本話徐濠縈會做半馬領跑員，結果佢因感冒甩底。其他報咗名參加嘅藝人天未光就去到起步點熱身做準備，今年參加全馬嘅有商台DJ唐劍康（Donald）同細So、周子駒、胡諾言等（成績詳見附表）。
以3小時55分鐘完成賽事嘅Donald，跑完後話：「我隻腳就嚟斷喇！相信呢世人都破唔到呢個最好成績。天氣好好，落到西隧仲好似開咗冷氣咁。」周子駒近4個鐘完成，比預期慢，因為跑到20幾公里時抽筋。胡諾言都係差唔多4個鐘，老婆陳琪帶埋囡囡去終點打氣。
洪卓立送驚喜
參加半馬嘅有湯怡、崔碧珈、馮允謙、江海迦（AGA）等，湯怡男友洪卓立去咗維園終點站迎接送驚喜，令湯怡冧爆。問湯怡如果立立帶埋花同戒指求婚會唔會仲感動？點知湯怡話有樽水就夠。崔碧珈話下次想挑戰全馬，不過唔知仲有冇品牌贊助。
至於10公里賽就有鄭融、Dear Jane嘅Tim、Jackal、C AllStar嘅釗鋒、鄭洢玲（阿旦）等。釗峰已經參加過幾屆渣馬，鄭融亦係常客，佢孖Jackal一齊跑，仲話好滿意今年嘅成績，雖然時間比舊年慢咗啲，但舊年跑到氣喘，連訪問都做唔到。另外，彭浩翔喺微博貼出參加渣馬嘅相，仲好搞嘢着住件「I hate running」（我討厭跑步）嘅戰衣。
撰文：馮仁昭
