早前有聽障人士因為冇手語繙譯，俾人誤送青山醫院搞到連份工都無埋，唔少人畀咗嬲嬲，其實呢個情況，就嚟可以改善，事關社創基金決定泵水160萬畀中大4個應用研究項目，其中一個就係建立手語醫學詞彙數據庫。呢個數據庫以手語影片同文字解釋常見疾病，幫聽障人士理解健康知識，仲可以將自己嘅症狀打印出嚟，畀醫生參考，解決溝通誤會。
另外，3個研究包括針對少數族裔學生學中文嘅困難，研究建立一個中文句子網上學習平台，有系統咁分析中文句子嘅結構，相信比用單字學習中文更有效。
機械人演話劇治療自閉童
亦有研究用機械人做話劇（Robot drama therapy），透過唔同故事內容，幫助自閉症兒童學習社交技巧；培訓長者中心內嘅社工，帶領社區內有輕度認知障礙嘅長者，透過小組分享提升自我管理能力，延緩長者自理能力嘅退化，呢種投資應用研究項目，好處係做到持續效益，又長遠改善更多人嘅生活，兼夾推動香港科研發展，本小利大，一舉幾得。