財金界唔少才俊愛跑步，好似瑞信何啟聰（Ivan）與招銀國際蘇沛豐（Daniel），噚日齊被編入10公里挑戰組，晨早五點幾開跑，跑出約50分鐘好成績，兩人都心思思想挑戰半馬。
Daniel第2年跑渣馬，噚日約以49分鐘跑完10公里，係個人最好成績。佢話可以突破到自己，係天氣同賽道舒適配合，加上挑戰組嘅跑手比較專心，條路冇咁塞人。Daniel嘅新目標唔再係時間，而係希望明年可以挑戰21公里半馬，今年會加緊練習。
Daniel跑完10公里，仲即刻趕去灣仔陪太太參加新增設嘅「1.8公里親子賽」，一面拍拖一面做運動，都幾溫馨，跑完仲可以享用大會提供嘅早餐。Daniel講笑話，現場目測，食嘅人似乎多過跑嘅人。
至於年初已負傷跑街馬嘅Ivan，近月再因腰傷，一度諗過放棄，不過Ivan話，佢嘅長跑賽里程就係由渣馬開始，有情意結，所以一星期前趁傷勢好轉即刻操練，最終以53分完成，係佢渣馬最好成績。
佢明年未必即刻轉報半馬，但希望年底前挑戰一次半馬賽。佢又話，今次最大得着，唔係跑快咗，而係睇到自己嘅堅持得到回報，相信亦係大部份長跑者嘅心聲。