本身係北區區議員嘅民建聯劉國勳，喺上年立法會選舉接黨友葉國謙棒出任立法會區議會界別嘅代表，不過佢依然關注北區情況，噚日約一眾傳媒到沙頭角、吉澳一帶「行大運」，睇吓當區情況。佢話沙頭角禁區一帶就算假日都冇乜人流，建議政府考慮每日設個限額，畀香港人申請入禁區一帶，以帶動旅遊業。
越來越多香港人鍾意生態遊，位於大鵬灣西南水域嘅吉澳一到假日都有唔少遊人，專登去食出名嘅手打墨魚丸。劉話由馬料水搭船去吉澳要兩個鐘，但沙頭角碼頭過去就廿分鐘到。以前吉澳有幾千人住，但𠵱家剩番幾十戶，唔少樓房仲日久失修。佢建議政府搵返業權人士，傾吓發展民宿嘅可能性，如果成功或會成為文青「打卡」嘅新景點呀。