【本報訊】樓價升不停，但樓宇設計卻走下坡。過往遠離煩囂、身份象徵的洋房，如今墮下雲端，突兀地出現在車水馬龍的將軍澳。屋外單車客穿梭不斷，路人抬頭便將單位內的佈置一覽無遺，住客要麼將生活變成一場真人Show任人睇，要麼只好長期落簾不見天日。
位於將軍澳唐賢街33號的會德豐新盤，名為Capri，自比水天一色的意大利著名島嶼，預計今年第三季交樓。428伙住宅單位包含13幢兩層高洋房，排列如同一個倒「L」字，實用面積由1,934方呎到2,445方呎，當中5幢已沽出，屬區內唯一一個樓盤成功售出洋房物業。
只靠一道圍牆相隔
目前樓盤外牆棚架基本上已拆走，現場可見與行人路及單車徑只相隔一道圍牆，不時有途人在道路上對洋房指指點點。拉呎一度，圍牆高度大約8呎，遮掩住洋房下層客飯廳狀況，但上層卻「走晒光」。若然有人心懷不軌，擔定凳仔或者拎條梯企上去，可以輕易竊探下層全貌，甚至翻身跳入屋苑範圍。他日洋房入伙，住戶便可走出露台與晨運客打招呼。
據樓書資料所示，未見發展商有為洋房特別添置保安設施，僅指樓盤各處會裝設閉路電視接駁到保安人員辦事處及出入口有智能卡讀卡器。另外，外牆會有垂直綠化，即現時外牆掛的大量黑色膠兜未來將會種植物。
高飛拍攝各幢洋房506方呎到1,057方呎的「花園」面積，全數地下鋪磚，毫無綠意，三面圍牆，上有露台，身在「花園」卻難以舒心，更無空間容納私人泳池等設施。
會德豐地產方面回應，集團往往以每個項目之地理環境因素為藍本，Capri、Savannah及唐俊街23號均位處澳南O'South臨海優越地段，沿海而建，飽覽藍塘海峽及港島東沿岸遼闊壯麗海景，因此提供罕有的洋房，極盡罕貴。3個項目所提供的居住環境，既可媲美西貢的海景洋房，同時不失港島東及九龍東的都會便捷，加上結合港鐵配套，是追求優質生活的現代都市人首選。另外，會德豐地產亦重視項目的保安，全面提升其生活質素。
【街坊意見】
將軍澳居民陳先生：「被迫望（洋房內籠），唔會專登望，你會唔覺意都望到啲嘢。係買嗰人自己選擇。我自己揀唔會住呢啲洋房，但香港地有人願打、有人願挨，所以咪有啲咁嘅現象。」
維景灣畔住戶盧氏夫婦：「喺屋企都成日望住呢度（Capri），𠵱家走落嚟睇吓啲House，真係唔係咁正。下邊嗰層無景，上邊嗰層同路人好近距離，無乜私隱。」
記者：陳東陽
