耀才證券（1428）噚日包場請客戶睇戲，65歲嘅老闆葉茂林心情勁靚，問佢周二情人節點慶祝？佢竟然口花花咁話：「情人節呀……睇下邊個肯做我情人喇」，都唔怕老婆扭佢耳仔！舊年農曆新年耀才都有包場請客睇戲，葉茂林仲帶埋佢位靚老婆出來見人，噚日好似唔見人，難怪葉茂林咁大膽，話睇下邊個做佢情人，不過，在旁嘅行政總裁許繹彬都有幫老闆兜一兜，話「情人節老闆約咗我開會呀，嗰日要返工吖嘛」。耀才財經台早前縮規模，噚日只有3位女主播撐場，問葉茂林仲會唔會請新主播，佢又嚟口花花話「啲靚女我哋一定請嘅」。