綽號「炒飯哥」的騎師羅理雅，剛戰沙田日馬搏輸「軍勇戰略」，不敵「翔惑」屈居亞軍，全日埋單羅理雅食白果，更已係連續兩期賽事冇馬贏。要養妻活兒嘅羅理雅，當然心急打破悶局，而佢亦以行動來證明自己嘅決心。
點解咁講，炒飯哥犧牲今朝禮拜日假期，天寒地凍特登嚟馬場操一隻馬「開心有你」然後即閃人歸家再瞓覺，咁神心仲唔係有計？
「開心有你」將跑周三(15日)快活谷夜馬三班1200米，仍有機會爭跑馬地百萬挑戰盃總冠軍。此駒今朝由羅理雅出跳時，廐主姚本輝亦喺烽火台吼到實，盡露緊張之情。晨操專家積奇指此駒體形壯碩，肌肉結實，步穩勁力貫注，狀態無可挑剔。「開心有你」今季6戰同程谷草1200米，取得3冠1亞1季，5歲馬大熟大勇而且路程正宗，羅理雅今仗當然要把握機會啦！