香港嘅球迷未必會聽過拿美路波爾個名，始終佢都仲只係一個高中生，但佢喺美國其實相當有名氣，唔單止佢自己本身係一位幾好波嘅球員，佢兩個哥哥都係打籃球嘅，當中大哥朗素波爾更加係美國名校UCLA嘅控衛。
朗素波爾係目前波爾三兄弟入面名氣較響嘅一個，唔多唔少因為佢舊年當選美國嘅 Mr. Basketball。呢個獎項已經由超過60年歷史，第一個攞獎嘅，係1955年嘅張伯倫（Wilt Chamberlain），即係曾經喺一場NBA射入100分嘅神人。之後嘅得獎者都好有名氣，好似球迷都好熟悉嘅前紐約人中鋒伊榮、「鬼見愁」莫寧、韋伯（Chris Webber）、加尼特、麥基迪、等等。千禧年之後，勒邦占士喺2002同2003年連續兩年當選，再近代啲嘅有依家打緊小馬嘅H班尼斯、木狼嘅A域堅斯同今年嘅選秀狀元賓西蒙斯等等。
波爾三兄弟入面，雖然暫時只有大哥Lonzo打緊NCAA，但美國傳媒報道，佢兩個細佬都已經口頭應承第時都會幫UCLA打波。其實，波爾家族仲有一位親戚叫做安祖波爾，唔使審，佢都係打籃球嘅。你話如果第時有一隊波可以請晒波爾家族四個一齊打波，今就真係「Ball，全部都係 Ball」啦！