原以為今個冬天不太凍，點知近日寒流襲港，沙田馬場清晨時份氣溫極低，加上天陰冇陽光，北風吹起都幾難頂。啱啱榮升第二任父親嘅潘頓就非常小心，朝早6點幾操完馬就即刻返騎師宿舍，費事凍親。
好多騎練昨晚（10日）去咗機場博覽館睇馬術大師賽，潘頓就反而馬場、醫院兩邊走，探望太太Nicole同初生囝囝Cash，冇時間去睇show。
潘頓話母子非常健康，周日（12日）就會出院，咁啱禮拜日冇馬跑可以放假，接至親返屋企，佢話呢幾日天氣寒冷，作為一家之主，一定會好好照顧全家，絕唔會畀佢哋生病。
講開凍，唔少人都記得舊年1月24日，香港出現半世紀一遇嘅寒流，氣溫跌到得番3度，加上落住雨，潘頓話當日跑日馬真係好難頂，凍到要幪住面上陣，
當時頭場佢騎「自動導航」跑第4後，感覺條跑道好似大雪櫃，解鞍時練馬師方嘉柏急急腳走埋嚟，問點解跑唔到三甲，潘頓話自己打晒冷震，塊面僵晒，連開口說話都有難度，好彩當日能夠跑晒11場賽事。