上星期在曼谷，處處碰到塞車，快速公路成為停車場，坐在的士上，可慢慢觀察四周景色。一位親戚係工程師，佢望得天橋、快速公路多，竟有發現，在建興酒家（Somboon Seafood）吃咖喱蟹時對左丁山講：「我留意到曼谷快速公路嘅橫陣數目，比香港公路天橋少一半，呢度起公路嘅成本，一定快過、平過香港好多。」橫陣少一半，安全性有冇標準㗎？親戚H話：「咁又唔駛驚，香港建築慣例係用英國安全標準，政府聽晒基建顧問公司意見，顧問又一定驚孭鑊，唔想日後有塌橋事件發生，所以往往穩陣保守到加零一，三條橫陣啱啱好，顧問就要夠六條，承包商趕工交貨之時，假如只做五條，亦無損安全性。」
咁講法，香港起公路天橋咪貴好多、慢好多？泰國好少發生塌橋事件嘅啫。親戚H：「可以係咁講，但香港天橋嘅壽命一定長過曼谷公路天橋，香港官員、市民可以瞓覺瞓得安樂，希望尊貴的議員唔好對工程費用咁多批評！」
親戚H有位表哥C原來到咗曼谷做交通基建地盤工程師，有一晚上大家約在Zanotti見面，食好味到極嘅Parma Ham Pizza之時，表哥C話：「其實都係日本公司派我過來嘅唧，台灣工程完畢後，返到東京冇幾耐，跟住就調我嚟曼谷，我先知道曼谷有不少工程根本係由日本財團融資嘅。」表哥C住咗曼谷幾個月，就大讚泰國人有禮貌、夠客氣，好過香港，亦好過台灣。表哥C話：「我駐在台灣三年，發覺台灣經濟無乜生氣，搵食不易，睇唔到前景，反而在曼谷幾個月，發覺遊客多籮籮，泰國人無憂無慮咁款，十分樂觀，連我都感染到一啲興奮氣氛。」
佢冇乜講錯嘅，左丁山只係嘆息曼谷塞車40年不變，泰國政府及曼谷市政府始終無力改善，一年唔知有幾多工作時間浪費在道路上，導致GDP增長率降低，認真計算下，塞車帶來之GDP損失，可能大得驚人。30幾年前，左丁山到曼谷call客，每日頂多見到兩至三人，不少時間損失在交通上，銀行上司不滿，問左丁山到曼谷是否偷懶去沖涼，住足五日都只係搵到十二個客戶見面，嘥晒酒店房間租金。唉，今天到曼谷call客，恐怕唔會好得幾多（唔係所有客戶都在BTS沿線）。呢晚在Zanotti，起碼有四成客人講廣東話，冇聽到普通話，真好，起碼唔怕訂唔到位先！表哥C以前竟然不知有此餐廳，食完沙律、pizza之後話以後同老婆要成為Zanotti常客喎。