阿仙奴錄得聯賽兩連敗，今晚主場對侯城可謂不容有失，近期備受球迷唾棄嘅領隊雲格唔知係咪心灰意冷，早兩日先發晦氣話球迷要學吓熱刺fans咁撐球隊，噚日又輪到「消息人士」、球會名宿伊恩胡禮公開表示，話雲格睇落相當憔悴，恐怕季尾完約就會離隊。
伊恩胡禮喺英國《BBC》一個電台節目表示：「噚晚我同雲格一齊幾粒鐘，我哋傾咗陣。當然佢冇親口咁講話『我季尾就會離隊』，但我望住佢，得到嘅印象就係咁。佢亦提到自己嚟到生涯尾聲，我從來未聽過佢咁講。」話晒兩人喺阿仙奴合作過三季兼身為多年老友，胡禮就認為球員令雲格失望了：「如果佢季尾真係離隊，球隊將會有好很多改變，球員亦應該深思自省一下。雲格一直對球會忠心耿耿，但睇嚟係癡心錯付。」