旺即係旺！騎師潘頓第四場以方嘉柏馬房「雲呢拿」勝出泥地一哩，隔一場後佢於第六場四班1600米，憑大摩馬房「美麗寶寶」再建一功，個人贏一對大熱門兼1檔馬孖寶，「美麗寶寶」單Win及組合獨贏A1分別派21及13元。
講番「美麗寶寶」，本身出自舊年本地拍賣會，身價600萬元，前仗由潘頓贏同班同程開齋，上次改由蘇兆輝發揮只得第三，今場和潘頓故劍重逢，沿途居中前位置，半條直路後上大勝兩馬位，贏得清脆利落，睇嚟潘頓囝囝Cash腳頭真係幾好，事關佢剛周三早上出世後，潘頓呢位後生阿爸兩次賽事都有馬贏，共拎咗三Win。
「美麗寶寶」仲帶挈埋馬主郭詩雅（莎莎老闆郭少明女兒）捧走這次沙田日馬唯一錦標仁愛堂盃；至於大摩除了「美麗寶寶」，連同第五場由韋達為「駿皇綵」在港一出即勝，順利包辦第五口孖寶兼捧盃。
第六場熱頭冷腳，二至四名分別為「常拼常勝」、「有衝勁」及「騂龍」，四重彩派二萬一千幾。其中「常拼常勝」係閘前落飛馬，結果同頭馬「美麗寶寶」包辦15倍綠燈連贏，令落飛黨贏大錢。三T大彩池冇人中正獎，中頭兩關第四搭第五場，可收32萬幾安慰獎。