雷神莫雷拉今日（11日）下晝又做早糊王，佢於沙田日賽由第二場開始連下兩城，先後勝出「華麗再現」及「笑春風」兩匹大熱門，獨攬第二口孖寶，累積連贏40個賽日未斷纜，繼續逐日改寫香港紀錄。
第三場四班田草1200米，來自文家良馬房的「笑春風」上仗服役初出跑同班同程，只不敵再出連捷的「一定賺」屈居亞軍，已盡露優厚潛質，今次雷神唔放手，人馬合作再來，結果由頭帶到尾輕輕鬆鬆贏1.25馬位順利補中，就此打開服役勝利之門，單Win及組合獨贏A1同樣派17元正。
文家良憑「笑春風」打破雞年齋缽，季內累積八Win，在練馬師榜微升一級至倒數第五位，距離續牌指標尚差八場頭馬。「笑春風」馬主永遠開心團體成員，包括股民好熟悉嘅陸叔陳永六。陸叔話自己出世紙係用陳永六，所以喺馬會登記做馬主，都係用陳永六名義。不過，佢已做咗宣誓，會統一用個「陸」字，稍後會去馬會申請改番用「陳永陸」，最可惜是陸叔有私事在身，今日並冇入場拉頭馬。
第三場開出熱頭冷腳，二至四名順序為「飛躍成功」、「紅旗星將」及「包勝」，四重彩派近五萬元。另外，閘前有告東尼馬房「帝聖寶貝」因健康理由，被競賽小組按獸醫建議着令退出。此駒變成仍未有出賽紀錄。