梁君彥上任立法會主席之初，因為國籍風波鬧到滿城風雨，新一屆立法會一開鑼就「開打」，一連流幾次會，轉眼間梁君彥已經做咗主席4個月。
佢噚日出席傳媒茶聚時笑言，呢段日子嚐盡五味，而近8、9個星期以嚟議會運作終於回復正常，對佢嚟講已經「好甜」。
梁君彥主持會議不時被民主派批評「吹黑哨」，被問到同民主派關係時佢話希望可以改善，但「議會係大家嘅」，而佢只係球證，幫助球賽順利進行，就算球員打球證都唔會贏到波喎。
佢唔評論特首參選人選，但就話同幾位參選人喺公事上有良好嘅工作關係，就連長毛梁國雄都好好，「好乖，工作關係OK」。
咁佢怕唔怕葉劉選唔到特首返嚟爭立法會主席？梁君彥笑言：「呢樣嘢好，（唔使做主席）冇咁辛苦，湊吓孫好過。」