元朗十八鄉鄉事委員會主席梁福元現年60歲，今時今日嘅標準嚟講，仲係好後生，連長者卡都未攞到，但原來佢已經有意退出江湖、不問世事，想將衣鉢由囝囝、元朗區議員梁明堅接棒。
家吓咁興跑馬仔，福元噚日同傳媒團拜時都親身示範上馬、策馬，佢冇話爭入閘，靈活度仲一啲都唔似60歲。但講到當今江湖事，佢就有少少看破紅塵咁，話上得車就要落得車，唔想好似鄉議局前主席劉皇發咁，做到80歲先退下火線，所以要睇吓乖仔明堅掂唔掂。
全程陪實老竇嘅梁明堅，早年喺美國讀完電子工程返港後，為咗幫爸爸打理生意而報讀中大園景設計及樹藝，之後為咗同兩個囡囡溝通好啲，去埋浸大讀心理學，甚至試過去港大報讀公共行政碩士，但就讀唔成。話說面試時考官一嚟就問佢爸爸係唔係梁福元，然後問佢點睇僭建？點解考官咁問佢就唔知，淨係知面試衰咗，原來有父幹唔一定成功㗎。