靚女人妻Icy黃婉曼又升呢啦！呢位於本月25日將滿33歲的前新聞主播，嫁俾馮柏基後百足咁多爪，既學整麵包搞生意，近排更成為馬主，愛駒甚至已經抵港，並剛剛改名為「跳出香港」，呢四個字正係Icy昔日做天氣節目時成名之句。
烙號A238的3歲法國自購馬「跳出香港」，由練馬師方嘉柏訓練，目前仍未被評分。馬主是跳出香港團體，此團體經理人正是馮柏基、黃婉曼夫婦。團體成員包括前騎師嚴顯強太太蔡曼恩、羅傑承女兒羅雪儀、另一靚女Cindy王仙兒等。
「跳出香港」來港前曾兩戰，跑1400、1600米全勝，1600米一役乃三級賽Willis Towers Watson Champions Juvenile Stakes。
「跳出香港」父系為Myboycharlie，在港同父馬包括得4冠5亞3季的「有心人」。不過，「跳出香港」抵港後暫時只展開基礎操練，相信最快約兩個月後，才會首次在港出賽。