下星期二係情人節，唔知一眾高官點樣同另一半慶祝？而有「民望高」之稱嘅食物及衞生局局長高永文平時日理萬機，情人節亦不忘𠱁太太。
民望高話早前接到香港潮屬社團總會創會主席陳偉南百歲壽辰宴嘅邀請，咁啱壽宴係情人節，陳老先生喺潮州社團地位崇高，自己又係「架己冷」，當然想為陳老先生祝壽，於是就懷住俾人鬧嘅心情問太太，點知高太不但冇鬧，仲好支持，決定情人節陪老公去壽宴。
八方心諗，民望高唔會咁平淡同太太慶祝情人節啩，於是問佢會唔會再食飯或者送花？點知民望高好鬼馬，細細聲同八方講，「花，梗係偷偷哋買」，仲話佢同中區一間花店好熟，會訂兩打紅玫瑰俾太太。民望高一路講，個樣都唔知幾sweet，但俾八方踢爆咗，唔知使唔使諗過另一個驚喜？