電盈主席李澤楷噚晚出席香港青年聯會主辦嘅「伴你啟航，創業導航」創業論壇，自爆讀中學時入咗一間好大嘅公司做。當大家以為佢話去老竇間長實做，點知嚟個反高潮，「嗰間叫麥當勞」，全場笑晒。除咗麥記，佢仲喺雪糕店賣雪糕，「見到靚女會畀多啲」。
咁多份兼職，佢話最有得着係做高爾夫球僮，幫人揹球棒。小小超話喺嗰度見盡人性，「打波為咗贏人，正面負面嘅嘢都夠膽做」，對佢有好多啟發，仲話如果時光倒流，想去多幾個國家做嘢見識，後悔當年唔夠膽咁做。
千禧年代，小小超鯨吞香港電訊一役，自嘲「一世人爭人最多債係120幾億美金」，但撞正科網泡沫爆破，8號仔股價由過百元跌到得番幾蚊，小股東鬧爆，小小超辯解，叫過人唔好喺高位買，「咁多年呢樣係我最痛苦」，唔知小股東點睇呢？