開年午飯中，金融H話大老闆看風駛𢃇，支持林鄭，自己身為選委，自不然要跟老闆投票意向一致。但佢幾驚如林鄭高票勝出，香港市民會反彈，因為投票結果似乎與當前民意相差太遠也。
根據Now公佈嶺南大學民意調查，曾俊華民望（在發表政綱前）大幅度上升，超出林鄭近17個百分點，支持率減反對率（支持淨值）比林鄭高出超過38個百分點，直情係精英班與第三班馬之別。林鄭讀書時，好似話考唔到第一就會喊，呢次在民望方面輸幾十個馬位，唔知有冇閂埋房門喊呢？
雙方民意有如此大差距，連金融H呢個內心「擁曾派」都大感意外，覺得好意外。佢問我地班人之中嘅公關高手W：「乜林鄭啲公關形象真係咁差？」公關W話：「林鄭與曾嘅公關公司都係我朋友，不便置評。」於是金融H就問左丁山：「你又敢唔敢講？」有乜敢唔敢吖，民望低落就賴公關顧問，係常見之事，總之公關顧問無論收錢或做義工，都係代罪羔羊。林鄭嘅公關原罪係CY 2.0，緊跟CY路線，係CY之替身，香港年青人，大學生一聽見CY撐佢，就一定唔會支持佢。此外，林鄭自己講到出嚟競選嘅理由係驚住選出他人會引發憲政危機喎，中產有教育程度人士一聽見就火滾。
呢兩大負面因素都非公關團隊可以抹得甩嘅，加上一啲蝦碌事件如唔識搭地鐵、唔識買廁紙，給五百元予湖南乞兒等等皆令人覺得林鄭堅離地，跟住仲同「性商品」we connect賣埋廣告，更係笑話。其實林鄭競選辦有六大公關老手坐鎮，如麥黃小珍（前中電及世聯高層）、戴健文（前副廣播處處長）、陳裕宗（前金管局公關頭頭及馬會公共事務高級經理）、邱文華（前市建局／機管局公關主管，現在係信和集團公關阿頭）及李鑾輝（前港台高層，現新鴻基地產公共事務總監），位位獨當一面，經驗豐富到極，如要挑骨頭，就係好多位嘅年紀都與林鄭差唔多，與網絡世界有啲脫節。英語有云：too many cooks spoil the broth，六位高手同時站在熱廚房，究竟邊個話事，邊啲人執行，可能大家都協調不了。莊曾之公關團隊由退休或離職公務員負責，佢嘅前政治助理羅永聰係前明報採主／信報網站主理人之一，屬精壯一代，聽講還有不同年紀嘅義工，論資歷就遠不如林鄭六位公關顧問咁巴閉咯。