政務司司長張建宗之前做勞福局多年，勞工權益一直係佢關心嘅範疇，但佢就唔多重視自己嘅「打工仔」權益，早前自爆出任局長9年幾，從未放過一日年假，之前脫離公務員系統時更放棄咗280日假期，折現嘅話夠買間丁屋喇！張建宗噚日首次以政務司司長身份出席立法會春茗，被問到有冇打破「傳統」，農曆年放假唞吓？佢笑言同大家一樣只係放「紅日」，冇額外拎大假噃。
長毛冇影 689牙斬斬
作為一個工作狂，張建宗提提大家，長年唔拎大假屬於高難度嘅危險動作，真係唔好隨便模仿。至於佢啲下屬會唔會因為上司唔放假而冇得唞？佢強調同事要放假絕無問題，亦冇聽過有人投訴。到底佢有幾鍾意做嘢？佢同八方講，返工真係畀到佢好大動力，直情「一打呔就興奮」，就好似球員可以落場、演員有演出機會一樣令人滿足，所以會珍惜每一日。
查實噚日嘅立法會春茗，特首梁振英、三司、行會成員同一眾高官都有出席，但出席嘅議員就清一色係建制派，原本報名出席嘅社民連梁國雄就唔見人。人走茶涼，梁振英難得去立法會冇人向佢示威，食得安樂之餘，都忍唔住牙痕講兩句，民建聯葛珮帆引述梁振英席間話長毛唔嚟，可能係怕大家支持佢參選特首，咁噚日餐飯就要計入選舉經費嘞。
立法會主席梁君彥則喺午宴上致辭，笑言要「提醒」在場人士，避免作出令人誤解係為特首選舉拉票嘅活動，又指今年係雞年，而雞有五德，包括文、武、勇、仁、信，如果出席嘉賓、議員都秉持呢五德服務社會，會獲市民認同；至於「鬥得」、「鬧得」，就唔係幾好喇。
李八方