練馬師沈集成周六(11日)沙田賽事有7駒列陣，邊隻係真命天子有機會勝出？睇動態毫無疑問以第七場二班1600米的「小米周」(英文名LUCKY GIRL)最似樣。
點解咁講呢？話說今朝賽前一日備戰，沈集成旗下成班馬隊喺機坪踱步熱身，廐主早在欄邊觀察牠們一舉一動，之後一眾賽駒排晒隊步往內圈踱步，沈集成眾裏尋她，只走到羅理雅策騎的「小米周」身邊，隻隻唔牽，唯獨親自拖住「小米周」步往內圈，一邊拖馬一邊向羅理雅交代操練指示，明顯對此駒情有獨鐘。操完沈集成又急急腳返回馬房閘口等睇「小米周」，再同羅理雅一齊入倉研究搏殺大計，咁緊張可以話畀晒貼士馬迷。
「小米周」今仗由葉楚航轉投沈集成馬房初出，當然希望即有表現擦靚招牌。此駒6戰同程田草1600米，得兩冠一亞兩殿，唯一不入前四名是上仗不放而留遭問話，只要今仗4檔肯擺前走，隨時重開勝門。