周四NBA常規賽，騎士雖然有新加盟嘅熱火棄將D威廉士（Derrick Williams）成為奇兵，但最終仍以109:118不敵雷霆，連續四場嘅作客之旅終於輸波。
騎士主帥路爾（Tyronn Lue）賽前大玩心理戰，話唔會派「三巨頭」勒邦占士（LeBron James）、K艾榮（Kyrie Irving）同路夫（Kevin Love），但最終三人就齊齊打正選。不過雷霆憑當家球星韋斯卜克（Russell Westbrook）交出今季第26次「大三元」29分、12籃板、11助攻，主場以118:109擊敗騎士。
雖然騎士今場輸波，但呢隊東岸一哥以10日合約簽入嘅2011年選秀榜眼、今個月六號俾熱火裁走嘅D威廉士就表現得唔錯，後備上陣22分鐘就交出12分。
KD回家勢引噓聲四起
另外，雷霆喺周六迎戰勇士（樂視明日9:30am直播），呢場係杜蘭特（Kevin Durant）離隊後首次到訪奧克拉荷馬，唔少球迷都話要用噓聲招呼佢，韋少對此就似乎唔多關心：「KD過去為奧克拉荷馬付出咗好多，我唔會在意球迷點對佢，今場只係常規賽，我只想贏波。」
