阿仙奴近兩場聯賽接連輸畀屈福特同車路士，又回到第四呢個「最佳位置」，唔少廠迷睇住無限輪迴，喺呢個moment真係要爆啦，受訪又好舉牌又好，講到明要領隊雲格OUT！雲爺爺都唔係第一次經歷呢啲關口，以為佢可以做到橫眉冷對千夫指，但周四喺賽前記招無啦啦嚟個「逆思考」，一於挑動廠迷最敏感嘅神經──盛讚敵對球迷！
雲格表示：「你冇可能去到上周二仲係球迷，然後禮拜六就唔再支持球隊，呢樣嘢唔合理。我哋每次去到曼聯、曼城、利物浦作戰，佢哋都有遠大嘅歷史同期望。我哋仲戰鬥緊，一定要團結一致，否則就冇機會做到。」嗱嗱嗱，再講落去就收唔番架啦……「仲有熱刺──每個人都參與戰鬥，每個人都喺背後支持球隊。我哋一樣要咁做，就算過去兩場結果令人失望。」北倫敦死敵你都敢讚？阿仙奴嚟緊三場先喺周六聯賽對侯城、下周中歐聯16強首回合作客拜仁，下周末再喺英足盃對非聯賽瑟頓聯，雲格惟有用好成績嚟撲火啦。