成班老友吃開年飯，講到特首選舉，爭相發言，非常熱鬧。上星期在曼谷吃個飽，處處平靚正，返到香港就覺得樣樣貴過人，怪不得在Terminal 21商場，碰到一位希臘遊客，佢猛咁講香港不易居。呢位中年希臘人單獨到東南亞自由行，由吉隆坡去新加坡，去香港，再經曼谷返回歐洲，點知在曼谷一住就係成個月，唔捨得離開。佢對左丁山講：「香港新加坡太貴，吉隆坡平淡無味，曼谷就正到無倫，價錢又負擔得起，我真係想在曼谷長住。」係吖，泰國有不少歐洲人長居於此，直頭樂不思蜀，邊度想返歐洲捱冷凍天氣呀。
香港物價係貴啲，但亦係搵銀好地方，薪酬比曼谷高得多，在香港賺錢儲錢，到曼谷消費就好過癮。今年賺錢環境得唔得呢？金融H話唔敢樂觀，因為外有特朗普怪招，令人諗唔到，內有本地特首選舉，隨時令特區政府與民眾對抗，導致立法會癱瘓。金融H話：「我係選委，大老闆現身林鄭造勢大會，你想我點？但內心條氣唔多順，因為不少同學朋友係AO，佢地冇個支持林鄭，叫我投JT一票，哎吔，一個係欽點，一個民望高，假如中央真的欽點林鄭，視香港民意如無物，七月一號以後，街頭示威不絕，怎麼辦？」
酒店C亦係選委，佢話明投票前要問過大老闆，聽指示辦事，佢本人對林鄭或JT都冇乜認識，認為邊個做都係阿爺話事嘅啫，大老細講乜咪做乜囉，左丁山笑佢：「你老闆有指示未呀？」酒店C話：「未有，佢話要等到最後一分鐘，收齊東南西北風先，千祈唔好押錯注，五年前本來話捧唐，點知後來聽命捧梁，老細好尷尬呀！」張德江已在深圳講明中央只挺林鄭一人，唔駛再收風咯。
今次晨早就拍咗板，指定捧林鄭，分析T話：「麻煩就在前面，林鄭民望大落後，拍馬追唔上莊曾，偏偏中央係要揀佢，實會令香港人條氣唔順，林鄭上台後必定舉步維艱，難以施政，香港繼續分裂。」
分裂不止在於政治取向，也在於社會民生，公關高手黃麗君講，「……要減輕撕裂便要觸碰到利益集團，哪一個參選人真的敢於觸碰利益集團？相信市民都很想知道。」（頭條日報2月7日）。幾乎所有利益集團都齊集林鄭競選辦公室，林鄭一定唔敢觸碰啦。