【又嚟玩混雙】最窄草地揀咩好?兩場泥地又點睇?

【又嚟玩混雙】最窄草地揀咩好?
兩場泥地又點睇?

周六(11日)沙田馬場舉行八草兩泥賽事,草地用最狹窄之C加3跑道作賽,睇番最近1月14日同一移欄賽事,一及二檔包辦五W,而且頭馬全部在彎位守貼欄或二叠位置競跑,其中「銀城福星」、「一定賺」及「爭分奪秒」貼欄擺前帶到,就算後上馬如「綽綽有餘」、「嬴風雲」及「恆駿寶駒」亦係彎位在內叠慳位留力,入直路才移出望空衝贏對手,走外叠轉彎嘅馬匹好蝕底。

今戰列陣馬中,尾場三班1400米的「爭分奪秒」兩次跑C加3欄全勝,反而在其他移欄未贏過,贏完後,其練者蔡約翰等番C加3欄再出可添食。

另外,角逐七場二班1600米的「怪獸家長」乃全場唯一贏過C加3欄之參戰馬,此何良麾下馬能憑較佳場地性能可秤先。

至於泥地跑道於周二(7日)進行翻土工程,預期場地狀況與剛周日賽事相同,當日兩場泥地賽頭馬「勇冠多」及「藍天堡馬」均放頭贏,所以蔡約翰安排的頭場四班1650米的「安友」及第四場三班1650米「紅運精彩」等擅跑泥地之前置馬可優先留意。