渣打香港馬拉松嚟緊星期日（12號）開跑，除咗全馬、半馬、10K呢幾場主要賽事之外，以往為政商界名人而設嘅領袖盃都好受注目，但原來大會今年取消咗領袖盃，認真可惜呀！否則，單係搵幾位特首參選人落場，已經夠睇頭喇。
以往政商界名人盡出
領袖盃自2009年開始舉辦，往年有唔少政商界名人落場，好似港大校長馬斐森、食物及衞生局局長高永文、九龍倉（004）太子爺吳宗權、東方海外（316）太子爺董立均等，每年都有幾十人參加，呢班名人平時多數西裝骨骨，難得見到佢哋着運動衫跑步嘅英姿，點知渣打竟然取消埋呢場比賽！
渣打方面冇特別解釋點解取消領袖盃，只係話想吸引更多市民參加，於是乎就新設「親子跑」，同以往領袖盃一樣都係跑1.8公里，由灣仔運動場出發至維園，細至12歲，老至82歲都可以三代同堂組隊參加，已經有200個家庭報名，夾埋有成600人。
咁跑開領袖盃班渣打（2888）高層去晒邊呢？據講，大中華及北亞地區行政總裁洪丕正今年唔使落場跑，主力負責頒獎，兼喺場外打氣。至於下月升任大中華及北亞地區個人金融業務總裁嘅尚明洋（Samir），就會參加10K捧場。