贏波叫雞食，輸波冇雞食，為咗肥美嘅靚雞肉，李斯特城嘅球員充滿動力嘞！早前有報道話李城領隊雲尼亞里見球隊成績差，禁止球員賽後食雞堡，但喺禮拜三嘅英足盃重賽，李城加時以3:1贏咗打比郡晉級，雲帥就格外開恩，准許班球員食雞……串！
李城之前喺英足盃第四圈作客打比郡踢成2:2，周三晚返到主場重賽，李城雖然由安迪京治喺46分鐘開紀錄，但61分鐘就被對手嘅艾度卡馬拉追平1:1，要踢加時分勝負。94分鐘，喺冬季轉會窗加盟嘅中場尼迪迪接應馬列斯助攻，為李城射成2:1。迪馬雷格雷喺加時下半場再入多粒，幫李城鎖定贏3:1晉級，下圈會對米禾爾。李城已經有成個月未贏過波，雖然呢場要踢到加時，對手亦只係英冠球隊，但班球員賽後都好興奮，因為佢哋有雞食。
成績太差雲帥禁食雞堡
呢排李城英超成績差到震，之後有報道話，雲尼亞里認為球隊表現差，係同球員嘅飲食習慣有關，所以唔准球員喺比賽後食佢哋最鍾意嘅雞肉漢堡包，只准佢哋食意粉。不過，難得球隊贏波，雲帥似乎喺禮拜三格外開恩，准班球員食雞。後衞基斯甸富治斯賽後放咗張相上twitter，見到佢拎住一條雞肉串燒，留言話：「雞肉又返嚟我哋嘅餐單嘞！」贏波先至有雞食，唔通呢招係雲尼亞里刺激球隊表現嘅方法？
雖然李城打入英足盃16強，但我求大俠睇雲尼亞里賽後講嘅嘢，睇嚟佢想放棄呢隻盃，專心打英超護級戰。佢話：「我都講過好多次，如果呢場贏波可以換到聯賽積分就好嘞，但我知係冇可能。呢場我哋贏波晉級，對我哋信心有幫助，希望可以幫到我哋聯賽嘅成績。我哋下場聯賽會對史雲斯，係今季其中一場最重要嘅比賽，我哋一定要贏！」
美韋達想見李城球員
李城下周日會作客史雲斯，家陣李城只係以得失球差壓過尾四嘅史雲斯排尾五，輸贏對今季護唔護到級影響非常大。另外，拳王美韋達嚟緊三月會訪問英國，話好想同李城球員見面，睇吓約唔約到時間。