曼聯噚日公佈舊年10至12月嘅業績，你想聽好消息定壞消息？好嘅係，曼聯又賺多咗，而壞嘅係，負債比前年同期升咗超過兩成！因為受英國脫歐影響，英鎊嘅匯價好似食咗瀉藥咁，所以曼聯嘅總負債增加咗8,720萬鎊，去到4.09億鎊（約40億港元）。曼聯方面話如果用美元嚟計，債務其實冇多到，只係英鎊匯價跌，所以睇落計數增加咗。至於曼聯收入繼續增加，2016年最尾三個月嘅收入有1.58億鎊，比2015年同期升咗18%；曼聯話呢季諗住總收入可以去到5.4億鎊。
曼聯球星放假都唔得閒
曼聯收入係咁升，除咗要多謝執行副主席活華特善於搵贊助之外，仲要多謝一班球星肯合作做宣傳。呢個周中曼聯冇波踢，咪以為班球星有得唞，話唔定仲忙過去比賽，好似隊長朗尼、伊巴謙莫域、安達靴里拉同迪基亞就喺奧脫福出席贊助商活動，宣傳吓贊助商嘅手錶。雖然佢哋着住西裝，但騷吓球技，傳吓波咁，都絕對難唔到佢哋，反而一嚿50公斤重嘅芝士就搞到朗尼同伊巴好吃力嘞，佢兩個一齊拎住刀，好似玩搖搖板咁切咗好耐，先至將嚿巨型芝士分開兩份。至於領隊摩連奴就好悶咁坐喺度，睇住班球員玩；據報，摩佬季尾會同曼聯傾續約。