維珍妮（2199）主席洪游奕除咗識睇「靚Bra」之外，亦鍾意睇美國NBA。公司嘅大客仔Under Armour老闆Kelvin Plank好識投其所好，舊年9月專登邀請咗NBA 3分球神射手、勇士30號仔Stephen Curry，去到深圳維珍妮廠房探洪主席兼送波衫㖭！
唔講讀者或者唔知，其實洪游奕做咗香港南華籃球隊班主兼領隊已經15年，對籃球當然唔止略懂一二啦。洪主席話，自從佢最鍾意嘅Michael Jordan退役後，好耐冇留意過新晉球員，所以對Kelvin Plank冇走數、特登安排「咖喱仔」去佢廠房探班都覺得好驚喜。
聽佢講，「咖喱仔」到訪當日，廠房幾乎停咗半日工，連一班員工都衝到戶外八卦一下，場面好熱鬧。洪游奕又大讚佢份人夠親切，噚日同傳媒講起都仲好興奮！