袁彌明（Erica）舊年辭去人民力量主席後，專心從商，佢創辦嘅彌明百貨更打算喺創業板上市，噚日佢出席活動時話，對比以前分心兼顧政治，「𠵱家專心啲，對公司營運、方向有仔細嘅計劃」。
雖然已經退下火線，但Erica對政治仍然十分關心。本身佢話唔講咁多政治嘢，不過提到長毛梁國雄日前宣佈參選特首，佢又忍唔住，用前戰友身份為長毛講番幾句。
「今年竟然好多民主派選委表明支持一個建制派參選人，我都覺得好意外」，佢認為分薄選票嘅講法只適用於同一陣線參選人，「大家細心諗吓，長毛同曾俊華係咪同一個陣營？佢哋嘅政綱係咪一樣？」
問佢會唔會回歸政壇，Erica就話暫時冇此打算，「都係嗰句，香港人需要我嘅時候，我都會喺度！」