農曆新年過後，甜到漏嘅中、西情人節即將來臨。小情人最終都希望結成佳偶，而中國社會向來對婚嫁都好重視，apm特別喺情人節舉辦「香港百年古董x創意婚嫁珍藏展」，展出中式婚嫁珍品收藏家李守政先生過百件由清代、民初、以至香港50至70年代嘅百年古董婚嫁珍藏品，同場亦有本地設計師將傳統裙褂升級再造嘅時尚手袋。
當中最矚目嘅可能係民國初期嘅「冠字」木雕牌匾，原來當年男士結婚前，要先獲得父母同意，仲要接過「冠字」牌匾，先至可以成家立室，同場仲有50年代手工精細嘅刺繡裙褂，以及以中式裙褂為主題嘅藝術創作，例如本地設計師將代表好意頭嘅刺繡圖案傳統裙褂，潮變特色手袋，等大家感受傳統婚嫁喜悅同時，亦以全新藝術角度欣賞傳統裙褂。