今年情人節對政界嚟講，特別多事，除咗係特首選舉提名期開始，一眾馬仔唔知會唔會擔凳仔搶閘報名外，亦係「七警案」裁決之日，就連特首參選人「薯片叔」前財爺曾俊華，亦喺呢日約會公民黨，「45條關注組」核心陳淑莊（Tanya）已經準備赴會，同薯片John促膝談心，唔知會唔會為《基本法》23條立法問題，擦出火花？
「我梗係𦧲飯應啦」
其實各大政黨都陸續約見參選人聽意見，公民黨喺星期二已經見完葉劉淑儀，身為該黨立會議員嘅Tanya亦有出席，但好戲在後頭，單身嘅佢透露下周二情人節，約咗薯片叔喺公民黨總部共聚，笑騎騎指：「嗰晚直情刺激，6點半開執委會，7點半見曾俊華，之後仲要開會！」
原來唔只盛女對薯片John有興趣，Tanya話唔知點解好多黨員都對呢個安排出奇地「踴躍」，「我以為係我咁豆泥嘅啫，你話2月14日開會，我就梗係𦧲飯應啦！哈哈哈！」原來薯片叔嘅魅力，對有冇拖拍嘅人以及男男女女都通殺。
咁表現踴躍人士包唔包括好事近嘅黨魁楊岳橋先？Tanya只係話，總之好多自己估唔到嘅男士都踴躍啦，包括正喺英國出席兒子畢業禮嘅黨主席梁家傑喎。至於奶媽林鄭，Tanya話未收到對方會面嘅要求，胡官則喺安排中。
而民主黨就搶先喺嚟緊嘅星期日（12日）見薯片叔，2月16日據知有初步提名策略。而前主席劉慧卿主持嘅網台節目，今日會訪問林鄭喎，唔知兩位阿姐有乜女人心事可以交流呢？
李八方