港大校長馬斐森早前宣佈提前離任，下年1月返家鄉蘇格蘭，去愛丁堡大學做校長。佢噚日最後一次參加港大傳媒團拜，話自從決定辭職之後，自己都唔係咁開心，要離開港大同香港都好悲傷。不過佢話離任唔等於終結，希望將來仲可以返嚟香港探朋友。佢趁機同太太、愛犬Darcy合照，流露感性一面
強調離任屬個人考慮
外間一直關注馬斐森係咪頂唔順校委會主席李國章，先提早離任，馬斐森噚日再被追問同李嘅關係，佢就叫大家唔好諗咁多，話離開港大有好多原因，但最主要都係個人同家庭原因。佢又話，港大一向唔係由一人管治，就算佢走咗，新校長嚟唔切上任，出現真空期都好，相信港大都會處理得好好。
港大首席副校長譚廣亨亦都大讚馬斐森有心、有遠見，但問到一旦請唔切新校長，會唔會由佢署任？佢就叫大家唔好猜測咁多，話港大有既定署任機制，到時會有適當安排喎。