禮拜二場西盃四強次回合，巴塞隆拿同馬德里體育會踢出花火，兩隊啲火藥味濃到爆，有效入球被枉判詐糊、12碼「宴客」同紅牌呢啲劇情全部都有齊！
最終，巴塞喺九個打10個之下，主場以1:1賽和馬體會，兩回合計贏3:2晉身決賽。
有詐糊有宴客乜都齊
上半場兩隊互有攻守，到43分鐘巴塞先開紀錄，當時美斯喺禁區頂起腳，馬體會門將莫亞撲出不遠，蘇亞雷斯執雞開紀錄。下半場戲肉嚟嘞，先喺57分鐘，巴塞右路沙治羅拔圖踩菲臘路爾斯，被罰第二面黃牌，巴塞首先踢少個。兩分鐘後，馬體會就藉打多個嘅優勢由基沙文窄位射入，但旁證話佢越位在先，入波唔算數。不過，睇番慢鏡，基沙文係冇越位。之後雙方越踢越躁，黃牌越嚟越多，到69分鐘就輪到馬體會嘅恩歷克卡拉斯高兩黃一紅被逐。77分鐘，美斯主射罰球，勁度十足，但中楣彈出。79分鐘，馬體會嘅加美路殺入禁區，被巴塞中堅碧基踢跌，球證直指12碼！馬體會已經醒咗，唔用12碼差到震嘅基沙文去射，而派加美路親自操刀，點知都係炒高。
踢和1:1兩回合贏3:2
係你就係你嘅，83分鐘基沙文橫傳畀加美路射成1:1，只要馬體會入多一球，就可以踢加時。喺比賽最後階段，雙方都踢得好肉緊，尤其係阿蘇。佢喺87分鐘先食張黃牌，三分鐘後，佢同佐治高基爭頂時，個踭頭好似批中咗對手，球證送多黃牌畀佢，巴塞變成九個打10個。補時階段都踢到飛沙走石㗎，菲臘路爾斯同布斯基斯都有拎黃牌，但巴塞最後守得住1:1完場，兩回合計贏3:2，連續四屆打入西盃決賽。不過，羅拔圖同阿蘇就要停賽，好在尼馬停完一場之後，決賽可以出得同美斯拍住上。至於阿蘇賽後好唔忿氣，覺得球證唔應該畀紅牌佢，「見到球證拎張紅牌出嚟，我真係笑咗。我根本唔覺得嗰吓係犯規，我要睇吓可唔可以打甩呢張牌。」但西媒話阿蘇賽後插球證，話唔定會被罰停多兩三場㖭喎。
另外，巴塞中場拿傑迪錫喺訪問中唔覺意透露咗美斯平時幾有霸氣，明明講緊佢同鄰居相處得幾好，突然拉埋美斯落水，「美斯初初買屋嗰陣，隔籬屋啲人比較嘈，結果美斯出手買埋隔籬間屋，好彩我未遇過呢啲問題。」