潮流興玩live，新晉股評人、富昌證券研究部總監譚朗蔚（Stevan）為幫公司吸客，呢個星期開始推出「富昌財經台」派冧巴，仲有特備節目《擊股鳴冤》畀股民哭股喪㖭。
Stevan係80後，用社交媒體做推廣應該零難度，單係佢facebook都有1.3萬個likes，仲有好多鐵粉叫佢「c fu（師傅）」留言同佢交流。
富昌並非首間證券行推網上財經台，最早應該係耀才（1428）推，仲有多位靚女主播，不過耀才早排先至請主播食無情雞，縮細規模，富昌反而𠵱家走去做，點解嘅？
望與散戶直接交流
Stevan就解釋，公司想借網上平台做branding，藉此同中港散戶有直接交流，同時希望將專業嘅財經資訊娛樂化、簡單化。
平台暫時只有一朵小花王澆樺（Afa，阿花），佢之前喺nowTV做財經新聞，𠵱家同Stevan拍檔。Stevan透露，以往有同阿花合作，欣賞對方嘅財經知識，又識幕後製作，於是叫對方加盟，希望日後製作更多專題節目。
富昌財經台每逢開市日，有3場半小時嘅live時段，周四加設特備節目《擊股鳴冤》，畀散戶一吐中伏之苦，即係哭股喪，輸咗錢搵人呻吓鬧吓都好嘅。
李華華
mailto:[email protected]