早前表態18票全數畀林鄭月娥嘅香港中華總商會噚日舉行新春酒會，會長蔡冠深一早預告請咗4個特首參選人出席，不過最後得林鄭同胡國興有嚟。八方聽聞，中總係噚日朝早先收到「薯片叔叔」曾俊華通知，話因為撞咗其他活動所以嚟唔到；至於另一參選人，新民黨葉劉淑儀就通知都冇喎。
葡萄儀鬍鬚曾冇到
講番個酒會，林鄭噚日着上紅色傳統賀年裝扮到場，一入到去，就企喺會場正中心，唔少人馬上上前打招呼同合照，而出席嘉賓有唔少人已表態支持林鄭或者直情係佢競選團成員，好似陳勇、盛智文等。另一邊嘅胡官就獲較少關注，不過難得同場，林鄭同胡官都有握手合照，至於大家期望4人同場嘅世紀合照，暫時就仲未出現。
酒會後蔡冠深被問到，係咪因為中總表晒態，所以其他人都唔嚟？蔡只重申4個都有邀請，可能對方事忙嚟唔到箒。八方問過有到場嘅新民黨副主席田北辰，佢話葉太原本打算嚟，但臨時有事延誤咗行程喎。