英超榜首車路士已經帶到離晒巷，坐穩第一；至於第二到第五位，就成日變嚟變去，嚟到呢星期就輪到利物浦唔好彩，做住五弟先。正當第二至五如輪轉，但第六位就十年如一日，唔好意思，誇張咗，係差唔多四個月如一日，都係曼聯。
曼聯已經連續15場聯賽不敗，係今季歐洲四大聯賽中，仲未斷纜嘅最長不敗紀錄。咁又點？咪又係第六。其實阿仙奴、利物浦同曼城都好畀面，今季都成日失分，但曼聯唔生性，變成和波專家。喺呢15場聯賽不敗入面，竟然接近一半嘅七場都係和波，所以難怪摩連奴早兩日都感嘆，如果啲和波變晒贏波，家陣嘅排名就不得了嘞！不過，小弟覺得，摩佬講埋呢啲「如果」同「假如」咪盞被人抽水，同雲格成日講幾年幾月「險簽」某人一樣。
點解曼聯咁多和波？其實同攻力有關，喺好多摩佬所講嘅冇運和波中，好多場曼聯都係壓住對手嚟踢，圍住嚟攻，但唔知點解射極都唔入，前鋒自然要孭鑊。不過樂觀啲咁睇，曼聯已經比上季進步，上季曼聯齋圍冇射，今季總算射到，只係命中率差。好鋼係用喺刀刃上，前曼聯領隊費格遜深明呢個道理，好捨得使錢買前鋒，例如佢臨收山一年買咗尹佩斯就即刻拎英超冠軍。雖然伊巴（圖）係好掂，但去到季尾，小弟真係擔心佢老人家嘅體力頂唔順，因為伊巴35歲嘞。起初諗住伊巴剩係踢聯賽，但整整吓，家陣伊巴已經係歐霸盃同英聯盃踢咗六場正選。
英超前四名爭奪白熱化，如果伊巴嚟緊仲保持住一周雙賽，話唔定季尾會大跌watt甚至受傷，希望當歐霸盃開番之後，摩連奴識得取捨啦。
文：咖喱