馬來西亞《星洲日報》喺周三爆料，指出一哥李宗偉上個禮拜因為大馬羽協嘅疏忽而令自己受傷，被迫退出三月舉行嘅全英賽，令呢位34歲嘅羽壇一哥嬲到要退出大馬羽協！李宗偉受訪時透露上周六到國家羽毛球學院嘅新球場練習時，已經同教練講過地板太跣會好易受傷，但係大馬羽協完全冇關心呢件事，結果李宗偉真係咁唔好彩跣低兼拉傷左膝韌帶，至少要休息三至六周，肯定打唔到全英賽。李宗偉事後大鬧羽協技術總監霍斯：「我受傷之後，佢都冇關心我傷勢，反而質問我教練我係咪會退役，佢係咪唔想我繼續打波？」不過，呢位大馬一哥就話即使退出國家隊，佢都會堅持出戰八月舉行嘅世錦賽，希望一圓成為世界冠軍嘅夢想。