阮兆祥為好友鄧兆尊勁勁一拖三齊人感情生活解畫：「呢啲唔係羨慕唔羨慕嘅問題，佢係經過專人訓練，同埋呢個唔關乎能力，係關乎緣份問題」。
緣份呢家嘢當然明白，虛無飄渺像霧又像花，似八十年代產量眾多金曲並非金曲歌詞經常出現；一切解釋不來諸事與之掛鈎，唯唯諾諾。心有不甘？除非夠膽量將一切打爛推倒，不然條氣點唔順，只好照舊按「緣份」本子照單全收。
「專人訓練」四字，祥仔又冇解釋清楚。
誰是專人？
佢老母祥嫂？佢老豆新馬仔？
二人似乎都非高手。
慈善伶王與祥嫂喺埋一齊之前，女人仔女點止一個？前妻與兒子們隱姓埋名數十年，至老豆歸西才從倫敦趕回港送喪，露過臉；明顯並非齊人之福局中人。
祥嫂看來也非享齊人之福箇中高手，天經地義與男友交往，為此跟子女幾乎鬧翻。
兆尊真如祥仔口中所指：另聘高明？
當今世上還有呢一科：齊人訓練班？
如果真的存在，兆尊不做校長也當做榮譽顧問，試問今時今日意欲做齊人者不少，真正成功出任齊人者鳳毛麟角，能夠光明正大一拖三，乃父新馬師曾都唔係佢嗰皮。
不理兆尊大婆、二奶、三奶樣貌素質如何；男歡女愛呢味嘢純個人觀點與角度，樣貌如浮雲，非局中人你識條毛？如魚得水情況只有當事人至清楚性福指數。年輕時奀嫋鬼命，誰又估到人到五十面口飽滿，一挑三不單止，搞到三個女人互生醋意，有賴兆尊有心有力。
男人擁一大一細是個考驗，大細兩個容易反目成仇。
添多一個，大孖二，二孖三相互協調悉隨尊便。
一不做、二不休、三及第、四季豆、五福臨門……十三姨隨時閃現，群雌論劍各自回味，來到妻妾成群爭風呷醋不合時宜，直情齊人之極品，新時代、舊時代無分！