特首候選人曾俊華提出公營房屋（主要包括公屋及居屋，以下統稱公屋）比例長遠達至六成，立刻被梁特抨擊，話就算唔再賣地起私樓，都未必做到。施永青亦鬧埋一份：「越來越多人入住公屋，唔係好事，不忍香港淪落至此。特首應帶領更多港人可控制自己命運。」
薯片叔叔呢個政綱，確係好有問題。梁特（唔好因人廢言）着眼於可行性，講得啱。根據統計處上年第三季數據，全港250.6萬家庭住戶，其中公營租住房屋有76.8萬戶，資助自置居所房屋有37.6萬戶，合計佔總數46%。
此比率由九十年代初至今大致穩定。要公營房屋比率升到60%，假設私人住戶數目不變，意味未來90萬戶新家庭都住公營房屋。由1991至2016年，住戶總數增加咗90萬戶，如果增速不變，即係到2042年再增加90萬戶！何況人口老化，住戶增速不及當年，薯片嘅宏願起碼到2047至可達成，仲要係一直唔再起私樓至得。
至於施老闆嘅感性批評，小生反而唔同意。香港嘅房屋問題，樓價高只係表徵，供應不足至係因。唔理公屋定私樓，有面積合理嘅穩定居所就可安居樂業。幾十年來，有四成幾人住公屋，何以見得佢哋不能「控制自己命運」？多人住公屋唔係淪落，但實行唔到就淪為廢噏。
笑笑生
mailto:[email protected]
本欄逢周四刊出