去曼谷之前，年廿八（一月二十五日）就去租Wifi蛋，老闆話：「乜都俾人租晒咯，冇貨」。於是年初四到達曼谷機場就去排隊買Sim咭，換走iPhone嘅原裝香港咭，換上曼谷咭，每張299銖，用7日之後，自動作廢，計價錢便宜過在香港租Wifi蛋好多，抵到極，不過最緊要識換Sim Card，千祈唔好遺失原機嗰張，及有耐性在曼谷機場排隊買，條龍幾長㗎！因為可以上網，每日收聽收睇香港網上新聞及蘋果動新聞，全無限制。於是知道林鄭月娥「晒冷」造勢之日，曾俊華展開網上眾籌活動，一位幾富有、年年捐錢俾母校中大聯合書院嘅校友來WhatsApp講，「I have made a contribution to JT. This is probably the only thing we can do to stop Carrie Lam (CY 2.0) to be our next CE!」乜捐錢捐得咁快呀，唔怪得第一日莊曾就在網上籌得180萬，有8000人捐款咁多。
但蘋果日報報導，有800人出席林鄭造勢大會喎，包括所有地產界大人物㖭，李嘉誠長和系除外。在重要關頭，冇法子唔讚李嘉誠，一士諤諤，有自己一套，不隨波逐流。林鄭有齊咁多財團支持，吳光正、李兆基、黃志祥、郭鶴年等等是但一位舉起個手指頭，都可以捐800萬俾林鄭月娥，或者搵張曉明寫四隻大字「林鄭月娥」，拿出嚟籌款，就會有人用二千萬元買入。林鄭既有全港李嘉誠以外嘅大財團富豪出錢出力支持，仲駛乜理民意呀，啲窮鬼民眾唯有一百幾十，或者一千兩千咁捐俾莊曾啦，眾籌三十日，籌唔籌到三千萬？林鄭幾乎講兩句就輕易到手啦！既然有咁多大有錢佬支持，林鄭仲敢講代表普羅市民？真係天大笑話。唔怪得五年前林鄭在電視鏡頭前講到支持麥齊光，眼淚滴下好感人，但今天麥齊光公開撐曾俊華，我地先至知道，曾俊華係冇做騷，但係直接為麥齊光寫求情信，喊住見記者嗰位林鄭，當日係做戲嘅啫。左丁山曼谷旅行隊內有一位建築界人士，佢話：「麥齊光係真正能幹好打得嘅高官，林鄭做發展局局長時，最叻就係talk talk talk，對唐英年好唔客氣，講到好白，話如果唐英年當選，佢就退休。勢估唔到唐英年頭馬林大輝今日竟然支持林鄭。」世事如棋局局新，好多選委財團仍要繼續搵食搵銀，現實就是如此。今勻係普通民眾對抗建制權貴，情況前所未見。