兩大紅人威力沒法擋！潘頓同葉楚航呢對華洋騎練近期鬥贏馬，這晚（8日）谷草一開場即以大熱門「心中有善」合作於第一場五班一哩食出頭糊，葉楚航連續贏到第四次賽事，潘頓更以頭馬慶祝自己朝早榮升第二任父親。「心中有善」服役首次上名即贏馬開齋，單Win及組合獨贏A2分別派41.5及23.5元。
潘頓老婆Nicole今早在山頂明德醫院，誕下第二胎雞年小男嬰，重約6.8磅，潘頓今朝亦在醫院陪伴左右，沒有到場操馬，結果Nicole順利分娩，和女兒Roxy湊成一個「好」字 。據知潘頓唔想囝囝名字太傳統，曾為改名傷透腦筋，左諗右度後挑選出4、5個英文名，揀邊個全權交俾由太太決定，最終這名小男嬰已改名叫做Cash，而Cash果然好腳頭，一出世父親即贏馬，潘頓可從「心中有善」身上分得約3.5萬元獎金Cash。
葉楚航表示今仗賽前有向「心中有善」馬主胡百滔講明馬兒有機會，不過胡生有公務在身未能抽空入場，希望日後有補拉頭馬機會。葉楚航指「心中有善」持續進步，長遠可跑更長路程，由於預計今場沒有步速，因此吩咐潘頓盡量擺前走，步速形勢對牠十分有利，是取勝關鍵。
葉楚航早前馬房團年晚宴上，話過下半季將會好勁，頭馬陸續有來，成件事真係不停應驗，「心中有善」既係佢連續第二個賽日食出頭糊，亦見證佢馬房一連四日有馬贏，攻勢一浪接一浪而來。
「心中有善」馬主胡百滔已經好耐冇拉頭馬，此駒沿途守第三位，末段後上一攻而破贏一馬位，姿態有餘未盡，睇嚟季內仲有得贏。至於同場二至四名分別為「樂家將」、「但求旺舖」及「升力」，四重彩派一萬七千幾。