林鄭月娥被指抄曾俊華政綱，學鬍鬚曾推累進式利得稅，鬍鬚曾話唔介意其他人抄佢，但其實佢自己都一樣抄橋。
鬍鬚曾噚日有樣學樣，學新民黨葉劉淑儀搵自己嘅理髮師硬銷自己，幫鬍鬚曾剪頭髮嘅基哥，識咗鬍鬚曾廿年，大讚佢係一個善良、正直、風趣幽默嘅人，話下屆特首不妨來個Plan J（曾俊華嘅英文名係John）。
葉劉早前搵嚟佢嘅髮型師「高佬」，講吓當年葉劉點樣貪方便整咗個爆炸頭，曾俊華嘅基哥就話曾俊華一嚟幫襯，大家都識做：「整個流程照舊，佢嘅髮型廿幾年都冇變」。
大讚鬍鬚曾幽默嘅基哥憶述，當年有新同事覺得鬍鬚曾熟口熟面，覺得佢好似財爺，基哥就帶呢位新同事去見鬍鬚曾，「曾生，呢個新同事話你好似財爺。」曾生就同呢個新同事笑笑口講：「係呀，（我）A貨嚟㗎！」