大台劇集雖然新瓶舊酒，不過新聞部有啲節目都唔係完全冇可取之處，特別係《新聞檔案》，就搵番昔日大新聞畀大家回憶一番，早幾日檔案就重播番03年時任民政事務局局長何志平，喺車公廟為香港求「凡事不吉」嘅下籤情況。2003年對香港人嚟講，真係一個百感交集之年，沙士爆發，50萬人上街反23條，當年情況歷歷在目，不過對球迷又唔係完全好差，因為利物浦同皇家馬德里兩支勁旅先後訪港。無巧不成話，今年兩支勁旅又可能都嚟香港，利物浦已經落實繼07年後再出戰英超挑戰盃，因為回歸20周年，足總又話積極搵皇馬嚟香港踢表演賽，到時負責頒獎嘅特首，又會係男定女呢？
利物浦（圖）球迷出名忠心，無論當地、香港以至全球都係，不過紅軍踏入2017年全面跌Watt，踢咗10場都係贏過英乙球隊普利茅夫一場咁大把，原本年初仲排第二，𠵱家跌到第五，更忠心球迷都開始不滿，據報上仗輸俾侯城，中場安利簡恩竟然被紅軍球迷以粗口手勢問候。講真，一隊成績起跌，都唔係一兩個球員問題，好似之前就話因為菲臘比古天奴因傷缺陣，又話因為沙迪奧文尼踢非國盃，今時今日兩人都已經出番晒，戰績仍然未改善，睇嚟真係結構問題。
睇紅軍對侯城一戰，大家都發現紅軍嘅壓逼性明顯冇季初咁強，或者仲可以賴一周雙賽影響體力，周六主場對熱刺，就真係休息足一星期，兩大主力亦都回歸，如果講壓搶都及唔上熱刺，就真係冇條件去爭前四嘞。
文：牽牛