「大師」林大輝仲做立法會議員時講過，感情上支持「薯片叔」曾俊華參選特首，但佢早排又加入咗「奶媽」林鄭月娥競選辦主席團，令人奇怪大師撐薯片定奶媽？林大輝噚日同傳媒拜年時解釋，話佢既支持奶媽、又鍾意薯片，就好似可以支持阿仙奴，但同時又鍾意曼聯一樣，真係令八方有種聽佛偈嘅感覺。
大輝話同奶媽私交唔多，但奶媽上月12日辭職並宣佈有意參選特首後，翌日（1月13日）來電請佢喺特首選舉幫手，令佢覺得奶媽好有誠意，所以唔使一分鐘就答應咗。
大輝又話，自己同薯片叔私下食過好多次飯，有好多共同話題，雙方一直係朋友，但對方未有正式邀請佢加入競選辦，雖然佢撐奶媽，但同薯片叔仍不時就政綱內容溝通。
坦言投票意向未定
至於冇出席奶媽分享會，大輝話純粹因為初三已飛咗去台灣旅行，表明自己嚟緊一定會提名奶媽，但最終點投票，就要考慮中央睇法、市民意願同參選人班底。
本身係英超球迷的大輝又話，佢支持奶媽又鍾意薯片叔，就好似佢鍾意阿仙奴，但又鍾意曼聯一樣，又話現時雖身穿阿仙奴波衫，但最重要係今次比賽公平公正，唔好似上屆選舉咁，有不道德踢法，否則唔排除會換番件衫，坦言最終投票意向未定，仲話邊隊人勝出佢都咁開心。
對於早前佢話要爭取佢提名嘅特首參選人，必須承諾換走教育局局長吳克儉，大輝認為林鄭最近話唔延續梁振英教育政策，其實已暗示吳得掂冇得留低。
李八方